Xəbər verdiyimiz kimi, Bakı şəhərində dam örtüyünə bağlanmış truba və digər inşaat materialları daşıyan minik avtomobiləri küçə və prospektlərdə yol zolağında heç nə olmamış kimi hərəkətini davam etdirir. Bu sözsüz digər avtomobillərə də təhlükə yaradır. Bəs, maraqlıdır, yol hərəkətinə təhlükə yaratdığı üçün belə avtomobillər üçün nə qədər cərimə təyin edilir?
Bununla bağlı Sonxeber.az Bakı şəhər Dövlət Yol Polisi İdarəsinin ictimaiyyətlə əlaqələr şöbəsinin rəisi, polkovnik Vaqif Əsədovun fikirlərini öyrənib:
“İstehsalçı zavod minik avtomobillərinin çəkisini, ölçüsünü, yükün ağırlığını təyin edərək həmin avtomobillər üçün “baqajnik”lər istehsal edir. Amma, bəzən təəssüflər olsun ki, sürücülər bunu “svarkayla”, armaturla , müxtəlif dəmirlərlə özünəməxsus qaydada kustar üsulla düzəldir. Apardığı yüklər də standartın tələblərinə uyğun olmayan iri qabaritli, çəkisi ağır olan yüklər olur. Belə avtomobillərlə adətən taxta məmulatları, armatur daşıyırlar. Sürücü daşınan yükün qabariti, eləcə də çəkisindən asılı olmayaraq yükü darta, çəkə bilsin deyə bunu edir”.
Polis polkovniki qeyd edir ki, bu birinci yükdaşıma qaydalarının pozulması, ikincisi tərəfdən standartın tələblərinə uyğun olmayan və yüklərin daşınması üçün nəzərdə tutulmuş kustar üsulla hazırlanmış texniki vasitənin quraşdırılmasıdır ki, məhz belə avtomobilləri 150 manat məbləğində cərimə gözləyir:
Vaqif Əsədov həmçinin bu gün texniki cəhətdən tam yarasız- metollom daşıyan avtomobilərə də rast gəldiklərini qeyd edib. O, Qanunvericiliklə belə avtomobillərin yol hərəkətində istismar edilməməli olduğunu da vurğulayıb:
” Bu avtomobillərin utilizasiya edilməsi üçün qanunvericilikdə göstərici olmalıdır. Söz yox ki, bu həllini taparsa, belə avtomobillər yol hərəkətindən kənarlaşdırılacaq. Bu gün yükdaşıma tələblərinin pozulması ilə bağlı faktlar aşkarlanırsa, əməkdaşlarımız sözsüz ki, inzibati- tənbeh tədbirlərini təsdiq edir. Əgər sürücü baqajnik yəni kustar üsulu ilə yükdaşımaq üçün yük yeri qoyubsa, belə şəxsləri 150 manat məğləğində cərimə gözləyir”.
