Kolonializm dünya tarixinin ən iyrənc, çirkin səhifələrindən biridir və təəssüflə qeyd edək ki, bu gün demokratiya, insan hüquqları və azadlıqdan dəm vuran dövlətlərin əksəriyyəti bu “yolu” keçib. Milyonlarla insanın qətli, yerli xalqların min illər boyu yaşadıqları ərazilərdən qovulması, rezervasiyalara yerləşdirilməsi hesabına dövlət qurub inkişaf etdiriblər. Bu gün də fövqəldövlət olmağa iddialıdırlar. Bu sıraya özünü “sosial, ekoloji, demokratik dövlət” kimi dünyaya sırımağa çalışan Norveç də daxildir. Özünü insan hüquq və azadlıqlarının müdafiəçisi kimi qələmə verməyə çalışan bu ölkə Fransa, ABŞ, Niderland və s. ölkələrdən heç də geri qalmır. Onun da keçmişi “qara ləkə”lərlə doludur və imici çoxdan korlanıb. Yəni, insan hüquqlarının müdafiəsi sahəsində “etalon” kimi dünya miqyasında formalaşan imici hər zaman reallıqla uyğun gəlmir.
