Paytaxtımız daha bir ilkə ev sahibliyi etdi: Bakıda regionda ilk dəfə beynəlxalq metal simpoziumu – “Baku Steel Art 2024” 17-30 sentyabr 2024-cü il tarixləri arasında müvəffəqiyyətlə baş tutdu. Qafqazın ən böyük metallurgiya şirkəti olan “Baku Steel Company” QSC (BSC) və təsviri incəsənətin təbliği sahəsində uğurları ilə adından söz etdirən “QGallery” bədii qalereyasının təşkilatçılığı ilə BSC-nin ərazisində reallaşdırılan simpoziuma Azərbaycan, Gürcüstan, Türkiyə, Rumıniya, İsrail, Hindistan və Bolqarıstan da daxil olmaqla, 7 ölkədən 12 nümayəndə qatıldı. Sözügedən tədbirdə ölkəmizi Rəşad Ələkbərov, Teymur Qəribov, Rahib Qarayev, Müşfiq Heydərov, Çinarə Baxşiyeva və Jalə Əliyeva kimi heykəltəraşlar təmsil etdilər. Beynəlxalq iştirakçılar isə Gürcüstandan Aleksandr Popxadze, Türkiyədən Nilhan Sesalan, Rumıniyadan Çiprian Hopirtean, İsraildən Nirit Levav Paker, Bolqarıstandan Kamen Tanev və Hindistandan Haribaabu Naatesan idi.
