Avropa Parlamentinə seçkilərin nəticələri təşkilata daxil olan ölkələrdən ən çox Fransada təlatüm və ciddi sarsıntılara səbəb olub. Sağlar və radikal qüvvələr bayram əhvali-ruhiyyəsində olsalar da, hakim komanda gərginlik içindədir. Artıq prezident Emmanuel Makron partiyasının Avropa Parlamentinə seçkilərdə ifrat sağçı namizədlərə sarsıdıcı məğlubiyyətindən sonra parlamenti buraxıb. Hətta yayılan xəbərlərə görə, parlament seçkilərində sağçılar qalib gələcəyi təqdirdə Makron dövlət başçısı vəzifəsindən istefa verə bilər.
