İranda növbədənkənar seçkilərə üç gün qalmış ölkənin ali rəhbəri Ayətullah Əli Xamenei seçki prosesinə birbaşa müdaxilə sayıla biləcək çıxış edib. Görünür, seçki öncəsi təbliğat-təşviqat kampaniyasının gedişi, xüsusən islahatçı namizəd Məsud Pezeşkiyanın əhali arasında dəstək qazanan fikirləri İran rəhbərini əməlli-başlı narahat edib. Və o, sanki prezidentliyə yeddinci namizəd kimi meydana atılaraq namizədlər arasında gedən debatlara qoşulmağa, həmin debatlar zamanı xüsusən ölkənin xarici siyasəti ilə bağlı fikirlərə münasibət bildirməyə məcbur olub.
