Azərbaycanda dünyasını dəyişən şəxslər üçün 3, 7, 40 və il mərasimi verir. Hətta bəzi bölgələrdə 52 mərasimi də verənlər var. Bu mərasimlər keçmişdən gələn ənənədir, yoxsa “Qurani Kərim”vacib buyrulan mərasimlərdir?
1AZ.AZ xəbər verir ki, bununla bağlı Big.az-a danışan İçərişəhər Cümə məscidinin axundu, ilahiyyat elmlər doktoru, professor Hacı Surxay Məmmədli bildirib ki, “Qurani Kərim” də ölünün 3, 7 və 40, eyni zamanda ölümünün ildönümü ilə bağlı mərasimlərin keçirilməsinə aid heç məlumat yoxdur:
“Sadəcə, bu ənənə şəkilində bizim dövrümüzə gəlib çatıb. Bəzi bölgələrdə 52 mərasimi deyilən bir mərasim də verirlər. Hədislərdə ölü üçün 40 mərasiminin keçirilməsinin vacib olduğu qeyd edilir. Bildirilir ki, 40-cı gün bədən parçalanır, ət sümükdən ayrılır. “Qurani Kərim”də ölü üçün 3, 7, 40-ın keçirilməsi ilə bağlı heç bir məumat yoxdur. Biz bunu 7 yox 8, 40 yox 39-da edə bilərik. Burada əsas məsələ dünyadan köçən əzizlərimizin yad edilməsidir. Ənənə 8, 12, 15, 21, 59 olsaydı da bu sual yenə ortaya çıxacaqdı. Məsələn, bəziləri tərəfindən Allahın adının 101 deyil 99 olduğu soruşulur. Bu əsilində rəmzi məna daşıyır. Əsas məqsəd dünyadan köçən əzizimizi anmaqdır. İnsanların oraya gəlməsi əzizini itirən şəxsin kədərini paylaşmaqdır. Çünki sevinci paylaşan zaman çoxalır, qəmi paylaşan zaman isə azalır. Əslində bu insanların həmrəyliyi deməkdir. Təsəvvür edin, kimsə əzizizini itirir. Heç kim onun yasına gəlib, qəmini bölmür. İnsanın ürəyi həmin an partlar və ölər”.
Hacı Surxay Məmmədli şəhidlərin qüsulsuz dəfn edilməsi məsələsinə də aydınlıq gətirib.
O, qeyd edib ki, 14 əsir bundan öncə peyğəmbərin nəvəsi Həzrəti İmam Hüseyn Kərbəlada şəhid olan zaman paltarı onun kəfəni, qanı isə qüsulu oldu:
“Bu əqidəvi məsələdir. Kimsə vətən uğrunda döyüşə gedirsə, o bilmir ki, şəhid olacaq yoxsa qalib gələcək. Qüsl alıb, evdə vəsiyyətini verib döyüşə gedən şəxs sağ da qayıda bilər. Bəzən evdən halalılq alıb çıxır. Düşünür ki, sağ qayıdacaq. Amma bir düşmən gülləsi ilə şəhid olur. Şəhidin vaxtı yoxdur ki, qüsl alsın, kəfən geyinsin. Döyüş zamanı geyindiyi paltar kəfəni, bədənindən axan qanı isə onun qüsulu olur. Hədislərdə buyurulur ki, bir insan vətəni uğurunda döyüşə gedərsə, düşmənin atdığı ilk güllə bədəninə dəyən zaman axan qan günahlarının kəfarəsidir. Şəhidlər cənnətdə peyğəmbərlərlə qonşudurlar. Mübariz, Fərid kimi və 90-cı illərdən bu günə kimi erməni gülləsinə tuş gələn şəhidlərimiz var. Şəhidlər heç bir zaman sorğu-sual edilməz”.
